كلمات أغنية كان الحزن ضيف

والله لو كان المقدر على الكيف ماغبت يا نايف ولا احنا ظمينا

الموت يانايف كتاب وتصاريف وحنا بحكم اللي خلقنا رضينا

العام يا أم سعود كان الحزن ضيف واليوم دق اوتادة الحزن فينا

الحزن غيمه غيبت نجمة الصيف وباأسباب جوره ياجواهر شكينا

غاب الحبيب ولابقى للهنا طيف والآه يانوره تهاوت علينا

كن الظهر ياسعود فيه انغمد سيف والصدر صار لكل الاوجاع مينا

اقول يامحمد متى فارق وكيف واصيح ياسارة متى هو بيجينا

يانوف من عقبه ترى بسمتي زيف جف الفرح من حولنا وانطفينا

أبوك يانواف ماله تواصيف وانشد مشاعل كان مثله لقينا

والكون ياهيفا بلا ظله مخيف واعذر بكانا يافهد لو بكينا

كان القمر كان البحر والمجاديف كان الحنان اللي بحضنه دفينا

وكان الملاذ لشاكي الضيم والحيف كم شال عنا كم خذا عن يدينا

عاش ورحل كله مهابه وتشريف جار الحرم فوق الحكي وان حكينا

والله لو كان المقدر على الكيف ماغبت يا نايف ولااحنا ظمينا

كل مارخيت الجفن جدت عواصيف والشوق ثار وفارقتني السكينه

وشفتك مثل شمس بروس المشاريف نورك يناديني وانا اقول وينه؟

والقاك واصحى والمحك راقي النيف حي ولو صلت عليك المدينه

أحسك بجواي ماهي تخاريف ياساكن عيون المهافي الحزينه

في ذا جلسنا بين صمت وسواليف وفي ذا الممر اثنينا كم مشينا

وفي هالزوايا كم جمعنا مواليف وياما على ذيك المرايا ضوينا

عشره عمرماتنتهي بالصواديف وذكرى تبي تحيا ولو مابقينا

الموت يانايف كتاب وتصاريف وحنا بحكم اللي خلقنا رضينا